Кийинки жылдан тартып өлкөдө таза мунай сатылып башташы күтүлүүдө

Бүгүн, 22-январда Жогорку Кеңештеги агрардык саясат, суу ресурстары, экология жана регионалдык өнүктүрүү боюнча комитети өлкөдө ЕАЭБ талаптарына ылайык экологиялык таза мунайга өтүү маселесин карады. Долбоор боюнча, өлкөдө бензинди евро стандарттагы категорияга 2021-жылга чейин өткөрүү пландалган. Бирок депутаттар коомдогу экологиялык маселени эске алып, таза мунайга өтүүнүн убактысын 2019-жылга чейин кыскартууну сунушташты.

Депутат Асылбек Жээнбеков өлкөдөгү мунай өндүрүүчүлөргө К2, К3, К4 үлгүсүндөгү бензинди өндүрүүнү уланта берүүнү сунуш кылды.

"Жергиликтүү өндүрүүчүлөр К2, К3, К4 үлгүсүндөгү бензиндерди чыгарууга уруксат кала берсин. Эгер биз бул категориядагы бензинге тыюу салсак, аны ички базарга сатууга гана чектөө киргизишибиз керек. Алар бул К2, К3, К4 мунайларын өндүрүп сыртка сата берсин. Биздин базарга сатуу үчүн "евро" стандарттагы К5 бензинин чыгарышсын", - деди Жээнбеков.

Депутаттар өкмөт жергиликтүү мунай өндүрүүчүлөр менен тыгыз кызматташып, 2021-жылга чейин жогорку сапаттагы мунай өндүрүүнүн үстүндө иштөө зарыл экенин айтышты. Ал эми комитет төрагасы Айтмамат Назаров өкмөттү мунайдын сапатын аныктоочу лабораторияларды ишке киргизүүнүн үстүндө иштөөгө чакырды.

Жогорку Кеңештин комитети 2019-жылдан тартып таза мунайга өтүү боюнча мыйзам долбоорун экинчи окууда колдоду.

Автор: Мунарбек Жоргомов