Кыргызгидромет: "11-12-апрелде өлкө аймагында үшүк жүрөт"

11-12-апрелде өлкөдө абанын температурасы төмөндөп, айрым аймактарда үшүк жүрөт. Бул тууралуу Кыргызгидрометтен кабарланды.

Маалыматта айтылгандай, 11-12-апрелде түнкүсүн Чүй, Талас облустарынын дыйканчылык аймактарында жана Ош, Жалал-Абад, Баткен облустарынын тоо этектеринде абанын температурасы -2°Сга төмөндөп, үшүк жүрүшү күтүлөт. Мындай үшүктүн жүрүшү алманын эрте бышуучу сортторунун ачылган бүчүрлөрүнө, өрүк жана алчанын ачылган гүлдөрүнө коркунучтуу.

"8-апрелден 11-апрелге чейин аба ырайы жаан-чачындуу болот, өлкөнүн тоолуу райондорунда, Бишкек-Ош автоунаа жолундагы Төө-Ашууда, Ала-Бел ашуусу, Чычкан капчыгайы, Ала-Бука-Каныш-Кыя унаа жолунда, Каракол-Эңилчек автоунаа жолунда кар көчкү түшүү коркунучу жаралат. Жолдордун айрым жерлери тайгак болуп муз тоңот. Унаалардын ортосундагы 500 метр аралык кыймыл чектелиши зарыл. 8-10-апрелде күтүлүп жаткан нөшөрлүү жаан-чачынга байланыштуу Ош, Жалал-Абад жана Баткен облустарындагы дарыяларында суунун деңгээли көтөрүлөт, тоолуу жана тоо этектериндеги райондорунда сел жүрүшү мүмкүн", - деп жазылат Кыргызгидрометтин маалыматында.

Автор: Кызжибек Раимова