Ош облусунун Ноокат районунда 22 жаштагы кызды апасы менен агасы никесиз төрөгөнү үчүн өлтүргөн. Бул тууралуу Ош ОИИБинин басма сөз кызматы маалымдады.
Маалыматка ылайык, маркумдун жансыз денеси Ноокаттагы суу сактагычтан табылган.
"22 жаштагы кыздын жансыз денеси суунун бетине калкып чыгып калганын көргөн күбөлөр укук коргоо органдарына билдиришкен. Жерине облустук ички иштер башкармалыгынын кызматкерлери барып, кыздын жансыз денесин алып чыгышканда анын буттары байланып, башы жарылган абалда болгон. Маркум суунун ичинде 20 күндөй калып калгандыктан, анын денеси суу бетине калкып чыгып калган. Тергөө иштерине ылайык, окуяга шектүү катары маркумдун 47 жаштагы апасы жана 24 жаштагы агасы кармалган. Сурак учурунда 47 жаштагы аял кызын өлтүргөнүн моюнуна алган. Ал кызы турмушка чыкпай жатып никесиз көз жарып алгандыгы үчүн коркутуп коюу максатында бутун байлап, сууга агызганын айткан. Учурда соттук-медициналык экспертиза дайындалган. Ал эми маркумдун апасы менен агасы убактылуу кармоочу жайга киргизилген", - дейт басма сөз кызматы.
Учурда тергөө амалдары улантылып жатат. Басма сөз кызматынан билдиргендей, маркум 5 маал намаз окуп жүргөн. Анын апасы жергиликтүү мектептердин биринде мугалим болуп эмгектенет.