"ЭЛДИК КАБАРга" жооп: Шаардык мэрия: "Ош шаардык транспорт каттоо мекемесине электр жарыгы өчүрүлөрү эскертилген, жарандар зыян тартканы боюнча далил келтиришсин"

"ЭЛДИК КАБАР" рубрикасына Ош шаарынын тургуну шаардык Жол кыймылынын коопсуздугун камсыздоо жана транспорт каттоо бөлүмүндө эки күндөн бери элди тейлөө тийиштүү шартта аткарылбай жаткандыгын айткан.

"Эл унааларын каттоодон өткөрө албай, узун кезекке туруп жатышат. Мекемеде электр энергиясы берилбей жаткандыктан кызматкерлердин жумушу үзгүлтүккө учурап жатат деп түшүндүрүштү. Ушундай мамлекеттик мекемеде кантип күйүүчү май менен иштей турган электр чордону жок? Унаабызды каттатып алып ишибизди улантышыбыз керек. Орусияга билеттерин алып коюп унаасын каттата албай, билети "күйүп" кеткен жарандар да бар.Такси кызматын көрсөткөндөр да ишинен калып жатат", - деп билдирген окурман.

Бул тууралуу Ош шаардык мэриясынын басма сөз кызматкери Азамат Абсатаровго кайрылганыбызда, ал SUPER.KG`ге төмөндөгүлөрдү билдирди.

"Шаарда оңдоп-түзөө иштерине байланыштуу электр энергиясы убактылуу токтотулуп жатканы чындык. Мындай пландык иштер алдын ала айтылып жатат. Эгер жарандардын мамлекеттик мекемелердин кызматынан зыян тарткандыгы тууралуу далилдүү фактылары болсо, бизге кайрылса болот. Мэрия тарабынан сөзсүз түрдө чара көрүлөт", - деди Абсатаров.

Автор: Бекболот Сарыбаев