КҮНСОБОЛ: Алмазбек Атамбаевди кол тийбестик макамынан ажыратуу процесси туура болдубу? Мурдагы элчи Кылычбек Султан: "Бул нерсенин артында мыйзамдуу эмес, саясий кызыкчылык турганы көрүнүп турат"

Эртең, 27-июнда Жогорку Кеңеш экс-президент Алмазбек Атамбаевди кол тийбестик макамынан ажыратуу боюнча чечим чыгарат. Буга байланыштуу SUPER.KG порталы "Алмазбек Атамбаевди кол тийбестик макамынан ажыратуу процесси туура болдубу?" деген собол салды. Буга карата мурдагы элчи Кылычбек Султан "Бүт эски "илита" саясий "таштандыга" кетиши керек" деген пикирин билдирди.

"Адилетсиз болду. Бул нерсенин артында мыйзамдуу эмес, саясий кызыкчылык турганы көрүнүп турат.

Мамлекеттин экономикасы итке минген абалда турганда бийлик бүткүл ресурсун реформага эмес, чычалоого, өч алууга жумшап жатат. Ушуга окшогон саясий кызыкчылыктарга келгенде бийлик, башкача айтканда, президент, Жогорку Кеңеш, өкмөт, прокуратура, күч органдары өздөрүнө ыңгайлуу чечимдерди чагылгандай тездик менен ишке ашырат. Ал эми эл күткөн экономикабыздын өсүшүнө байланыштуу маселелерде, адилеттүүлүк маселелеринде ташбакадай кыймылдоо адатка айланды.
Менин оюмча, Атамбаев айткандай, бүт эски "илита" саясий "таштандыга" кетиши керек", - дейт мурдагы элчи Кылычбек Султан.

Автор: Эльвира Караева