Орхан Инандынын дайынсыз болушу: Бишкектеги Түркиянын элчилигинин алдында митинг өтүүдө

Бүгүн, 1-июнда Бишкектеги Түркиянын элчилигинин алдында тынчтык митинги өтүүдө. Чогулгандар "Сапат" лицейинин негиздөөчүсү Орхан Инандынын тезинен табылуусун талап кылышууда.

Митингге аталган билим берүү мекемесинин окуучулары, ата-энелер жана мугалимдер жамааты катышууда.
Алар колдоруна "Орхан Инанды табылсын", "Билим бергендерге тийбегиле!" деген өңдүү жазууларды кармап турушат.

"Биз азыр элчиликтен жооп күтүп турабыз. Кыйкырбай, эч кандай тартип бузбай, табылусун гана талап кылуудабыз. Эч кимге эч кандай тоскоолдук жаратпай турабыз", - деп билдирди митингдин катышуучусу.

Буга чейин "Сапат" билим берүү мекемесинин негиздөөчүсү Орхан Инанды дайынсыз болуп изделип жатканы кабарланган.

Анда 1-июнь күнү болжол менен саат 4:20да "102" кызматына 12-кичи районундагы көп кабаттуу үйлөрдүн биринде Lexus 470 үлгүсүндөгү унаасынын эшиги ачылып, ичинде ээси жок бош турганы тууралуу билдирүү келип түшкөн. Милиция кызматкерлери айтылган дарекке барганда Орхан Инандынын баласы арыз менен кайрылган. Анда атасы 31-майда кечки саат 18:00дө байланышка чыккан бойдон дайынсыз экенин жазган.

Бул маселеге байланыштуу бүгүн, 1-июнда "Сапат" лицейинин өкүлдөрү маалымат жыйын өткөрүштү. Жыйында жактоочу Зоотбек Кудайбергенов унаа табылганда, ичинде Орхан Инандынын баалуу буюмдары (акча, эки уюлдук телефону, документ жана башка) калганын айтып, алардын башка кызыкчылыгы болушу мүмкүн деген божомолун билдирди.

Анын айтымында, Орхан Инандыны Бишкекте кармап турушат деген дагы версия бар, бирок бул маалымат тактала элек.

"Ал эч качан саясатка аралашкан эмес. Буга чейин коркутуулар деле болгон эмес. Азыр алдын ала жыйынтык чыгарууга эрте. Көптөгөн ар кандай варианттар айтылып жатат. Биз тергөөнүн жүрүшүнө байланыштуу азыр кандайдыр бир так маалымат бере албайбыз", - деп билдирген ал.

Октябрь райондук милициясынан ички иштер органдарынын аймактык бөлүмдөрүнө багыттамалар берилгенин, издөө жана иликтөө иш-чаралары тынымсыз жүргүзүлүп жатканын билдиришти.

Көп өтпөй дайынсыз болуп жаткан Инандыны табууга президент Садыр Жапаров кошумча күч тартууну тапшырган.

Автор: Гүлзина Каныбекова
Фото: Гүлзина Каныбекова