Башкы прокуратура Ахматбек Келдибековго коюлган айыптарды жарыялады

19-ноябрда башкы прокурор Аида Салянова тарабынан ЖКнын депутаты Ахматбек Келдибековго каршы кылмыш иши козголуп, 20-ноябрь күнү Ахматбек Келдибеков УКМКнын тергөө абагына камалды.

Башкы прокуратуранын басма сөз кызматынын маалымдашынча, депутатка КРнын Кылмыш-жаза кодексинин “коррупция” жана “кызматтык абалынан кыянаттык менен пайдалануу” беренелери боюнча кылмыш иши козголгон.

Депутаттын кармалышына төмөнкү иштер себеп болгон:

2005-жылы Социалдык фонддун 21 миллион сомдон ашуун акчасын максатсыз чыгымдаган;

2003-2004-жылдарда “Ротак-Бишкек” жоопкерчилиги чектелген коомго жарандардын жекече камсыздандыруу эсебин бастырып чыгаруу үчүн каражат бөлүп берген;

ЖКнын төрагасы болуп турган кезде парламенттин эл аралык уюмдардагы өкүлчүлүктөрдүн иштерин тескөө боюнча атайын өкүл кызматын мыйзамсыз уюштуруп, аны кармоого мамлекеттик казынадан 10 миллион сом чыгымдаган;

"Салык органдарын ыктыярдуу патент боюнча салык төлөөчүлөрдөн салык чогултууну “Бизнес-Партнёр” жоопкерчилиги чектелген уюмуна мыйзамсыз берүү аркылуу кызматынан кыянаттык менен пайдаланган" деген айыптар тагылууда.