Кытай элчилигинин кызматкерлери өлтүрүлгөндөрдүн өздүгүн аныктоо үчүн Караколго кетишти (кыргыз-кытай чек арасындагы окуянын хронологиясы)

Мамлекеттик чек ара кызматынын башчысынын милдетин аткаруучу Райимберди Дүйшөнбиев бүгүн, 24-январдагы маалымат жыйынында “Кытай элчилигинин кызматкерлери өлтүрүлгөндөрдүн өздүгүн аныктоо үчүн Караколго кетишти” деп билдирди. Ал Бишкектеги Кытайдын элчилигинен расмий кат келип түшкөнүн, ошондой эле тергөө жүргүзүлгөндөн кийин алардын сөөгү өз өлкөсүнө берилерин айтты.

Окуянын хронологиясы

2014-жылдын 23-январында Аңчылык чарбасынын кызматкери Александр Барыкин аңчылык лагерине кайтып келе жатып белгисиз адамдарга жолугуп калат. Алардан өздүгүн тактоочу документтерин сураганда эч кимиси кыргыз же орус тилинде сүйлөшкөн эмес. Андан соң Барыкин дароо Ысык-Көлдүн кыргыз-кытай чек арасындагы кызматкерлерге «Пикертык» жылынуучу жайынын аймагында 11 адамдан турган топ байкалгандыгы туурасында маалымат берген. Белгисиз адамдардын тобун колдон чыгарбоо үчүн өзү "Пикертык" жылынуучу жайында аларды туткундоо аракетин көргөн.

Кылмышкерлер Барыкинди өлтүрүп, анын аңчылык куралын тартып алышкан. Кармаш учурунда Барыкин кылмышкерлердин экөөсүн мылтыгы менен атып өлтүрүүгө жетишкен.

Окуя болгон жерге чек арачылар келишкенде, кылмышкерлер аларга ок чыгарышкан. Кыргыз-кытай мамлекеттик чек арасынан 40 чакырым аралыкта жайгашкан “Пикертык” жылынуучу жайында кылмыштуу топ чек арачылар тарабынан курчоого алынган.

Кылмыштуу топтун байкалгандыгы жана алардын курчоого алынгандыгы тууралуу чек ара өкүлчүлүктөрүнүн байланышы аркылуу Кытай тарапка дароо маалымдалган.

Чек арачылардын "багынгыла" деген талабына кылмышкерлер баш ийишкен эмес. Андан соң атайын операциянын жүрүшүндө Ысык-Көл чек ара кошуунунун чек ара кезметине куралдуу каршылык көрсөткөн кылмыштуу топ башка күч түзүмдөрүнөн кошумча аскер бөлүктөрү тартылбастан, КРнын Мамлекеттик чек ара кызматынын аскер кызматкерлери тарабынан өлтүрүлгөн.

Башка күч түзүмдөрүнүн атайын даярдыктагы топторуна аба ырайына байланыштуу окуя болгон жерге өз убагында жетүүгө мүмкүнчүлүк болгон эмес.

Кыргыз Республикасынын Мамлекеттик чек ара кызматынын аскер кызматкерлеринин арасынан бир чек арачы жеңил жаракат алды.

Азыркы тапта окуя болгон жай курчоого алынган, иликтөө иштери жүрүп жатат. Райондун борборуна аңчылык лагеринде калган АКШнын жараны Уортер Роджер Эдворт, ошондой эле каза тапкан Барыкиндин денеси Каракол шаарына алынып келинди.

Иликтөө ииштеринин жүрүшүндөгү алдын ала маалыматтар боюнча, белгисиз адамдардын жашы 25-30 чамасында, сырткы келбеттери уйгурларга түспөлдөш. Кылмышкерлер жарандык кийимчен, буттарында спорттук бут кийимдер болгон. Тергөө иштеринин жүрүшүндө Куран китеби, жайнамаз, теспе, бычак, тамак-аш менен кошо жана башка буюмдар табылган.

Александр Барыкин 1952-жылы 1-январда Түп районунда туулган. 1977-жылы Иркутск шаарындагы Айыл чарба институтунда билим алган. Кесиби боюнча биолог-мергенчилик таануучу. 1994-жылдан тартып Ысык-Көл облусундагы мергенчилер жана балыкчылар коомун жетектеп келген. Үй-бүлөлүү, эки баласы Орусияда жашайт. Кесиптештеринин айтымында, Барыкин чет өлкөлүктөрдү коштоп ууга чыгып турган.

Автор: Айпери Ганыжан кызы