Испаниялык “Севилья” УЕФАнын Евролигасын утуп алды (фоторепортаж)

УЕФАнын Суперкубогу эми испаниялык клубдардын ортосунда ойнолмой болуп калды. "Севильянын" Суперкубоктогу атаандашы 24-майда "Реал"-"Атлетико" тирешинин жыйынтыгында билинет.

"Бенфиканын" күйөрмандарына 2 жыл катары менен бул мелдештин финалында жеңилүү катуу тийди.

Кевин Гамейро пенальтилер сериясындагы 4-голду киргизип, кубоктун Испанияны көздөй кетүүсүн камсыздады.

Дарбазачы Бету испаниялык клубга артыкчылык алып келди.

"Севильянын" оюнчулары атаандаштар жаза баскан сайын кубокко жакындап баратышканын сезип турушту.

Португалиялык команданын лидерлеринин бири Оскар Кардосо пенальтилер сериясында жаза баскан биринчи оюнчу болду.

"Севильяны" команда катары өнүктүрүп жаткан Унаи Эмери...

"Бенфиканын" машыктыруучусу Жоржи Жезуш оюнчулары менен кошумча 15 мүнөттүктөргө болгон пландарды талкуулап жатат.

"Бенфиканын" күйөрмандары жана кызыл түскө толгон "Ювентус" стадиону...

Англиялык "Манчестер Юнайтеддин" мурунку машыктыруучусу Алекс Фергюссон менен "Ювентустун" машыктыруучусу Антонио Конте финалдык оюнга жандуу күбө болуп кайтышты.

Иван Ракитич (№11) оюндагы башкы каармандардын бири болду.

Эсекиэль Гарай өнөктөштөрүнүн жакшы мүмкүнчүлүктү бошко кетиргенин аңдап жатат.

Күйөрмандар...

Оюн курч мүнөздө өттү.

"Ювентус" футболдук клубунун стадиону "Ювентус Стэдиум" бул күнү туриндик клубду эмес, башка командаларды кабыл алды. "Ювентус" жарым финалда дал ушул стадиондо "Бенфика" менен тең ойноп, финалга чыга албай калган.

Кечээ, 14-майда Италиянын Турин шаарында УЕФАнын Евролигасынын финалдык беттеши орун алды. Анда испаниялык “Севилья” менен португалиялык “Бенфика” кез келип, оюндун негизги убактысы 0:0 эсебиндеги тең чыгуу менен жыйынтыкталды.

Натыйжада “Севилья” оюндан кийинки пенальтилер сериясында 4:2 эсебинде жеңишке жетишти. Испаниялык клубдун португалиялык дарбазачысы Бету “Бенфиканын” оюнчулары Оскар Кардосо менен Родригонун пенальтисин тосуп, командасына чоң артыкчылык алып келди.

Кошумчалай кетсек, “Севилья” буга чейин УЕФАнын Евролигасын 2-ирет уткан (2006, 2007). Бул наам башкы машыктыруучунун бул клуб менен жетишкен биринчи чемпиондук наамы болду. Ал эми “Бенфика” ушуну менен 8-ирет Европа Лигаларынын финалында утулуп жатат.