Жогорку Кеңештин депутаты Ыргал Кадыралиеванын бир тууганы Канжар Кадыралиев Өзгөн районуна караштуу Куршаб айылынын тургуну, жеке ишкер Сактан Келдибаевдин кафель чыгарган бизнесин талашууда. Бул тууралуу Келдибаевдин 80 жашка таяп калышкан ата-энеси бүгүн, 10-октябрда Бишкекте өткөн маалымат жыйынында айтып чыгышты.
Алардын айтымында, депутаттын бир тууганы Канжар бир топ жигиттери менен ишкерди коркутуп, бизнесин өткөрүп берүүнү талап кылып жатышат. Ошондой эле ушул жылдын 31-август күнү ишкер Келдибаевдин үйүнө куралданган төрт жигит бет капчан кирип, коркутуп, акча талап кылышкан. Учурда бул окуя тууралуу президент Алмазбек Атамбаевге кайрылуу жолдоп, чара көрүп берүүнү талап кылышууда.
Бирок 31-августтагы окуя тууралуу Канжар Кадыралиев менен жабырлануучунун телефондогу сүйлөшүүсү жазылган аудиожазуу жарыяланды. Анда депутаттын агасы ишкерден эч кандай акча талап кылбаганын айтат. Аудиожазуудан ишкердин “Мени "20 миң доллар алып келбесең, СПИД жугузулган шприц сайып, балдарыңды кошуп өлтүрүп коём" деп коркутканыңдан 2 миң доллар бергем. 31-августта Сашка (Абдисалам) үйгө кирип, тапанча такап, тополоң кылды. Эми коркпойм” деп айтканын угууга болот.