Жалал-Абад. Арстанбап аймагында тоо коюнунда жайгашкан лагерде 100 бала эс алып жатат

Базар-Коргон районунун Арстанбап аймагындагы тоо коюнунда жайгашкан Жалал-Абад облустук ички иштер башкармалыгынын "Келечек" балдар лагеринде учурда 100 бала эс алып жатат. Бул тууралуу 1-июлда Жалал-Абад ОИИБинин басма сөз кызматы билдирди.

Белгилүү болгондой, жыл сайын жогорудагы лагерде өспүрүм балдарды 10 күндөн 2 агымда эс алдыруу уюштурулуп келет. Түрдүү социалдык абалдагы балдар, анын ичинде балдар үйүнүн, реабилитациялык борборлордо тарбияланган, аз камсыз болгон үй-бүлөнүн балдары, тарбиясы начар болуп каттоодо турган өспүрүмдөр, милициянын жана ардагерлердин уул-неберелери келип эс алып кетишет.

Башкармалыктын жетекчиси Жеңиш Жоробеков жана УКМКнын аталган облустагы өкүлү Канжар Бокаев лагерде эс алып жаткан балдардын абалын көрүп келишти.

Автор: Айпери Ганыжан кызы