КИНОЗАЛ: "Белгисиз маршрут" тасмасы ачуу чындыкты көрсөтүп, келечек тууралуу ойлонууга мажбур кылат

SUPER.KG'нин "Кинозал" бөлүмүндөгү комедиялык жанрда тартылып, бирок ачуу чындыкты көрсөткөн, адамды келечек тууралуу ойлонууга мажбур кылган тасма - "Белгисиз маршрут" тасмасы. Анда жүргүнчүлөр аркылуу бир өлкөнүн тагдыры, андагы коомчулук, келечекке болгон ишеним чагылдырылат. Тасманын режиссёру - Темир Бирназаров. Тасмада Дүйшөн Байдөбөтов, Эгемберди Чалабаев, Күмөндөр Абылов, Асылбек Өзүбеков, Бакыт Мукул, Жылдыз Сегизбаева, Табылды Актанов сыяктуу актёр-актрисалар роль жаратышкан.

Буга чейин режиссёр Темир Бирназаров: "Белгисиз маршрут" сыяктуу мамлекеттик кинонун башкы максаты – жалпы коомго тиешелүү олуттуу маселени көтөрүп чыгуу, аны көрүүчүгө жеткире билүү. Мен улутумду сүйгөн адаммын, андыктан бул тасма аркылуу улут маселесин көтөрүп чыгууну чечтим. Биз ар бирибиз ар башкачабыз, мүнөздөрүбүз, көздөгөнүбүз, тилектерибиз. Кээде өз максатыбызга жетүү үчүн чыккынчылыкка, сатууга барабыз. Бирок териштире келсең эле баарыбыз бир тууган болуп чыгат экенбиз. Көрүүчүгө жеткирейин дегеним – ынтымак, анын күчү жана улутубузга зарылдыгы",- деп бизге берген маектеринин биринде билдирген эле.

21 жүргүнчүсү бар айылдык автобус туман каптап турганда Келечек айылын көздөй алыс жолго чыгат. Күлкү менен ый, уруш-талаш менен жалпы кубаныч коштогон жөнөкөй эле сапар бир чоң окуяга айланат. Ызы-чууга түшкөн жүргүнчүлөрдү Үмүт аттуу жигит ынтымакка чакырып, автобусту бирге түртүп чыгарууну сунуштайт. Көпчүлүк жаш жигитке ишеним артабы же ызы-чуу уланып, көздөгөн дарегине жетпей калышабы? Суроого тасманы көрүп, жооп алсаңыз болот.

Тасманы толугу менен бул жерден көрүңүз.

Автор: Турсунай Алымкулова