Күз мезгили менен кошо келген жаңы окуу жылына карата даярдыктар жүрүп жатат. Учурда өлкөнүн бардык аймактарындагы базарларда эл толуп, окуу куралдарын жана мектеп кийимдерин сатып алуу аракеттери көрүлүүдө. Жаңы окуу жылына карата мектеп формаларынын баасы жана окуу куралдары боюнча маалымат алып, окурмандарга сунуштоо үчүн Бишкек шаарындагы базарлардын бирине бет алдык.
Базарга баш багарыбыз менен балдарын ээрчитип кийим тандап жүргөн сатып алуучулар, товарларын жарнамалап сунуштаган сатуучулар тобуна туш келдик. Алгач 3 баласына мектеп формасын сатып алып жаткан Ак-Ордо жаңы конушунун тургуну Мырзабек Ажымаматов менен маектештик.
"Быйылкы жаңы окуу жылына 3 балама мектеп формасын жана окуу куралдарын сатып алганы жатам. Балдарымды ээрчитип жубайым менен базарга келдик. Эки балама 3 миң сомдон форма сатып бердим, 1-класска барган балама кийим сатып алыш үчүн 2600 сом короттум. Жалпысынан 3 балама 8500 сом жумшадым. Ал эми окуу куралдары былтыркы жылга салыштырмалуу бир аз кымбатыраак экен. Бул үчүн дагы 4-5 миң сом акча жумшалса керек", - деди Ажымаматов. Анын айтымында, үч баласына тең форма алып берүү бир аз оорчулук жаратууда.
"Үч баламды тең окуу жылына даярдоо оңой болгон жок. Үй-бүлөлүк каражатты эптеп жеткирип алып берип жатам", - деп кошумчалады Мырзабек Ажымаматов.
Ал эми айрым капчыктуу үй-бүлөлөр үчүн 3 миң сомго мектеп формасын, 2 миң сомдон ашуун каражатка окуу куралдарын сатып алуу кыйынчылык туудурбайт. Балдары чет өлкөдө эмгектенген Зарыл Үмөталиеванын айтымында, базардагы баалар аны канааттандырат. Зарыл Үмөталиева эки небересине жана 1 студент кызына кийим сатып алып жатканын билдирди.
6 жылдан бери соода иши менен алектенген сатуучу Гүлдана Ысакова ата-энелер атайын тигилген мектеп формасын сатып алып, аны менен катар соода жакшы болуп жатканын айтты. Ошондой эле өз сөзүндө сатуучулар быйыл көп болгондуктан, 2015-жылга салыштырмалуу мектеп формалары арзан сатылып жатканын кошумчалады.
"Мектеп формалары Кыргыз Республикасынан, Түркиядан жана Кытайдан алынып келинет. 1-класстар үчүн формаларды 1200 сомдон дүңүнөн сатып алып, 2200 сомго чейин сатабыз. Чоң класстардын формасын дүңүнөн 1700 сомго сатып алып, 2800-3000 сомго сатабыз", - дейт сатуучу Ысакова.
"Белгилүү болгондой, базардагы соодагерлер сатылуучу товарларга болгон бааны базар наркына салыштырып өздөрү коюшат. Сатуучу өз алдынча бааны кымбаттата албайт, анткени азыркы убакта атаандаштык абдан жогору. Бааны көтөрүп саткан сатуучунун товары сатылбай калат. Мындан улам базарда товарлар төмөнкү наркта сатылат. Мындайда сатып алуучулар үчүн ыңгайлуу шарт жаралат", - деп билдирди базардын Профсоюздар уюмунун төрайымы Замира Саткеева.
Эркек балдар үчүн мектеп формаларына болгон баалар:
Пиджак-шым - 2000 сом, ак көйнөк 250-300 сомго чейин. Галстук 50-70 сомго бааланат. Ал эми бут кийим 500 сомдон 900 сомго чейин сатылса, спорттук бут кийимдер 550 сомдон 2500 сомго чейин. Ошондой эле сумка 300 сомдон 600 сомго чейин сатылууда.
Кыздар үчүн мектеп формаларына болгон баалар:
Пиджак, юбка 2000 сомдон 3000 сомго чейин сатылса, бантик 100-150 сомго, узун байпак 100 сомго сатылууда. Бут кийимдерге 450 сомдон 650 сомго чейин баа коюлган. Ички кийим 200 сом, сумкалар 300-1000 сомго сатылууда.
Ал эми окуу куралдарына жалпысынан 500 сомдон жогору каражат сарпталат. Аларга канча акча кетирери сатып алуучунун капчыгына жараша болот.
