Дастан Бекешев: "Азиздер жана дүлөйлөр коомунун башчысы Мамбетакуновду мен камай албайм"

26-сентябрда Бишкекте Ак үйдүн алдына Азиздер жана дүлөйлөр коомунун мүчөлөрү митингге чыгышты. Алар аталган коомдогу мыйзамсыз аракеттерди жөнгө салуу боюнча, ошондой эле Жогорку Кеңештин депутаты Дастан Бекешев мандатын тапшырсын, Азиздер жана дүлөйлөр коомундагы иштерге аралашпасын, анын төрагасын коргобосун деген талаптарды да коюшкан.

Бул боюнча депутат Бекешев SUPER.KG порталына буларды билдирди:

"Митингге чыккандардын сөзү толук бойдон жалган, себеби мен Мамбетакуновду (ред. Калык Мамбетакунов Азиздер жана дүлөйлөр коомунун төрагасы) эч качан коргогон эмесмин. Тескерисинче, жумушчу топ түзүп, бүт мыйзамсыз иштерди ачыкка чыгардым. Ошол жумушчу топто митингге чыккан кишилер болгон. 22-июлда коомго отчёт бердим. Эми коом ишти өзү жүргүзүшү керек. Мамбетакуновду жоопко тарта албайм, андай укугум жок. Ким буларды митингге чыгарып жатканы белгисиз, бирок артында бирөөлөр турат. Далилдерим мындай: 1. Бир ай мурун алар түштүк аймактарга барып, ошол жерде ызы-чуу салышып, жыйындарда кыйкырып жүрүшкөн. 2. Бир ай мурун эки аял эки батирди басып алды, азыр ошол батирлерде жашап жатышат, милиция эч нерсе кылбай жатат. 3. Өткөн аптада дагы эки батирди алабыз деп, үйлөргө мыйзамсыз кирип баштаган, бирок милиция келип аларга эскертүү берди. 4. Алар сот аркылуу 225 батирге арест салышты, ага карабай митингге чыгып жатышат. 5. Жалган каттарды депутаттарга, өкмөткө, президентке жазып жатышат жана башкалар".

Кайсы тараптыкы туура экенин тийиштүү органдар териштириши керек. Бул чуу көптөн бери уланып келе жатат.

Автор: Автандил Добулбеков
Фото: Интернет булактары