Бишкекте тиешелүү мекемелер унаа жолуна коюлган дөңсөөнүн кереги жок экенин 2 айдан кийин түшүнүп, алып жатышат (фото)

Бүгүн, 29-сентябрда Бишкек шаарындагы бир тараптуу Исанов көчөсүнүн Фрунзе көчөсүн кесип өткөн аймагында 2-3 ай мурун коюлган дөңсөө алынып жатат. Мэриянын алдындагы "Бишкек асфальт-сервис" муниципалдык ишканасы буйрук Патрулдук милициядан берилгенин айтышты.

Патрулдук милицияга байланышканыбызда басма сөз кызматы башта дөңсөө коюу керектигин мэрия демилгелегенин билдиришти. "Ооба, дөңсөөнү кайра алуу чечимин Бишкек шаардык патрулдук милициясынын көзөмөлдөө бөлүмү чыгарган. Себеби дөңсөө жол чыракка жакын жайгашып, унаалар 10 метр аралыкта катуу деле күүлөнгөнгө жетишпейт. Ошондой эле жөө адамдар бул аймактан аз өтөт", - деди Таалай Бугубаев.

Мындай дөңсөөлөр кайсы бир аймактын тургундарынын суранычы менен же кырсык көп катталган жайларда коюлат, бирок бул дөңсөөлөрдү жайгаштырууда анализ жүргүзүлбөгөнү байкалып турат. Канча сумма коротулганы боюнча узаткан суроолорубуз жооп тапкан жок. Ошентсе да бюджеттен каражат максатсыз пайдаланганын танып болбойт.

Автор: Максат Кудайбердиев
Фото: Динара Абдыкадырова