1,5 айда унаа үчүн салык төлөбөгөн 1000ден ашык айдоочуга айып салынды

1,5 айда унаа үчүн салык төлөбөгөн 1000ден ашык айдоочуга айып салынды. Бул тууралуу Салык кызматынын басма сөз кызматы бүгүн, 19-октябрда билдирди.

"Салык кызматы тарабынан унаа үчүн салык төлөбөгөндөрдү аныктоо максатында жүргүзүлгөн 1,5 айлык рейддин жыйынтыгында 1092 айдоочуга 3 миллион 800 миң сом өлчөмдө айып салынган. Алардын ичинен мамлекеттик казынага 1 миллион 500 миң сом түштү", - деп айтылат маалыматта.

Эске салсак, унаа үчүн салык төлөөнүн акыркы күнү 1-сентябрда бүткөн. Андан бери ИИМдин алдындагы Патрулдук кызмат менен биргеликте 411 рейд жүргүзүлүп, 1980 акт толтурулганы маалым болду.

"1-сентябрга чейин унаа үчүн салыкты төлөбөгөндөр эми 2 миң сом өлчөмүндөгү административдик айыптан тышкары ар бир күн үчүн туумду да кошо төлөшөт. Салык төлөгөндүгүн ырастаган чаптама салык органдары тарабынан бекер берилерин эскертебиз", - деп кошумчалашкан Салык кызматы.

Автор: Үмүт Абдраимова
Фото: Интернеттен алынды