Пианист Азамат Сыдыков: "Үч ирет жайынан казылган Сатыбалдиевага мүрзөдөн тынч орун бере албаган кыргыз бийлигин айыптайм"

Ала-Бука районунда үчүнчү ирет жерге коюлган баптист аялдын сөөгү казылып алынган. Төртүнчү ирет коюлган жайы белгисиз болуп, коомдо бул кызуу талкууну жаратып, өлкөнүн дин аалымдары, юристтер бул маселе боюнча өз пикирлерин билдиришкен. Дин маселеси өлкөдө курч экени буга чейин да бир нече ирет айтылып келген эле. Бул боюнча, дегеле Кыргыз өлкөсүндө болуп жаткан түрдүү маселелерге чет өлкөдөгү мекендештерибиз да кайдыгер эмес экенин билдиришүүдө. Алардын бири кыргыздын таланттуу уулу, АКШда жашаган пианист Азамат Сыдыков жеке пикирин SUPER.KG порталына мындайча билдирди:

"Христиандык Европа дүйнөнүн бардык элин кабыл алып, жашоого мүмкүнчүлүк берип, жер, мүрзөдөн жай берип жатат. Азыр биз дүйнө элинин көзүнө кандай көрүнүп жатабыз? Чет жерде баш кесерлер, фашисттер мигранттарды жердигине, динине карап бөлүп, өлтүрүп жатышса, баары кыйкырып чыгат да, өзүбүздүн жаранга жеткенде ушунча шылдың, келеке менен мамиле кылышат. Түркөйлүктүн, билимсиздиктин туткуну болгон жергиликтүү тургундарды айыптай албайм. Мен Каныгүл Сатыбалдиеванын үй-бүлөсүнө коопсуздукту түзүп, ага мүрзөдөн тынч жай берүүнү камсыз кыла албаган өлкөнүн бийлигин айыптайм. Бул Кыргыз өлкөсүнүн биримдигине жана аброюна урулган чоң сокку болду. Эгерде бүгүн биз мүрзөлөрдү динине карап бөлсөк, эртең көчөлөр менен шаарларды этникалык тибине карап бөлүп баштайбыз. Бул жерде теңирчилер, тигинде христиандар, ары жакта атеист корей, орустар деп...

Элден салык алып жатканда "Сен христиан, атеист, коммунист эмессиңби?" деп сурабайт да. Баарынан бирдей өлкөнүн керек-жарагы үчүн салык алышат. Ал эми мүрзө тууралуу сөз болгондо, көрдүңүздөр да, адам өзү кызмат кылып, мээнети менен салык төлөгөн жерден чарчы метр жайга ээ болбой калганын. Жер да бир гана "тандалгандар" үчүн болуп калды. Муну караңгылык деп эсептейм. Дүйнөдө 2,4 миллиард христиан бар. Алардын 900 миллиону протестанттар жана протестант баптисттер. Бул АКШ, Германия, Нидерланды өлкөсүнүн жашоочуларынын жарымын түзөт. Акча алып жатышканда эч ким "Бул протестанттардын акчасыбы же мусулмандардыкыбы?" деп сурабайт. Ал эми адамды коргоого келгенде сөзсүз түрдө анын ким экенин билүү зарылбы?"

Ошондой эле Азамат Сыдыков 22-октябрда "Сөөгү жерге берилбей бир нече жолу убара тарткан маркум Каныгүл Сатыбалдиеванын элесине жеке концертимди арнайм. Ал - мекендешим, өлкөнүн жараны, мээримдүү эне, аялзаты. Өз жарандарын коргой албаган, улуту, ишеними, расасы жана саясий көз караштарына карабай, Баш мыйзам талап кылгандай алардын укуктарын коргоп бере албаган бийликти айыптайм" деп, концертин ала-букалык, баптизм агымын тутунуп, сөөгү 3 жолу казылып алынган Каныгүл Сатыбалдиеванын элесине арнады. Концерт АКШнын Түндүк Каролина штатында өттү.