Барак Обама 8 жылдык башкаруу мөөнөтүндө эс алууга жана саякаттоого 85 миллион доллардан ашуун каражат короткон

АКШнын президенти Барак Обама 8 жылдык башкаруу мөөнөтүндө үй-бүлөсү менен эс алууга жана саякаттоого 85 миллион доллардан ашуун каражат короткон. Бул тууралуу АКШнын Жашыруун кызматынын президенттин үй-бүлөсүнүн чыгашалары тууралуу документтерине ээ болгон "Judicial Watch" уюму жазып чыккан.

Орточо эсеп менен жылына президенттин үй-бүлөсү 10 миллион доллардай коротчу. Бул сумма коопсуздук, учуу, көчүү чыгашаларын, кызматкерлеринин унааларынын ижарасын, мейманканалардагы номерлерин да жапкан. "Judicial Watch" 2015-жылы Обаманын Гавайидеги эс алуусу 4,8 миллион долларды түзгөнүн кошумчалап, 85 миллион доллар акыркы көрсөткүч эмес экенин белгилеген.

Маалыматка ылайык, президенттин айлыгы жылына 400 миң долларды түзсө, жылына дагы 50 миң доллар коротуу мүмкүнчүлүгү бар. Ага фонддон саякаттоого жылына 100 миң жана эс алууга 19 миң доллар бөлүнүп турат.

Обама отставкага 2017-жылы 20-январда кетет. Ал эми жаңы шайланган президент Дональд Трамп айлык акысынан баш тартып, жылына 1 доллар үчүн гана иштээрин билдирген.

Автор: Үмүт Абдраимова
Фото: Интернеттен алынды