Саламаттыкты сактоо жана милдеттүү медициналык камсыздандыруу боюнча байкоочу кеңештин жыйыны өттү

Вице-премьер-министр Чолпон Султанбекованын төрагалыгы астында Саламаттыкты сактоо жана милдеттүү медициналык камсыздандыруу боюнча Байкоочу кеңештин жыйыны өттү. Жыйында Кыргыз Республикасынын Өкмөтүнө караштуу Милдеттүү медициналык камсыздандыруу фондунун 2016-жылкы ишинин жыйынтыгы тууралуу отчёту угулуп, 2017-2020-жылдарга карата Фонддун Өнүгүү стратегиясы сунушталды. Бул тууралуу өкмөттүн басма сөз кызматы 16-февралда билдирди.

Милдеттүү медициналык камсыздандыруу фондунун төрагасы Марат Калиев маалымдагандай, 2016-жыл жыйынтыгы боюнча алгачкы медико-санитардык көмөк көрсөтүү деңгээлинде, тактап айтканда, көзөмөлдөө жана кароодон өткөрүүдө көбүнесе кемчиликтер аныкталган. Ошол эле учурда аталган убакытта дарылоодогу кемчиликтер кыскарган. Облустар алкагында караганда кемчиликтер көбүнчө Ысык-Көл жана Нарын облустарында белгиленген. Жалпысынан кемчиликтердин деңгээли 1,6 пайызга жогорулаган.

Марат Калиев белгилегендей, стационарлар деңгээлинде да кемчиликтер жана негизсиз госпиталдаштыруу аныкталган. Негизсиз госпиталдаштыруу деңгээли Жалал-Абад жана Нарын облустарында байкалган. Оорулууларга амбулатордук дарылануу керек болгон учурда аларга стационардык дарылануу дайындалган. Натыйжада бюджеттин көп бөлүгү жоготууга учуроодо.

Буга катар Милдеттүү медициналык камсыздандыруу фондунун төрагасынын айтымында, 2017-2020-жылдарга карата фонддун өнүгүү стратегиясынын алкагында каражаттарды Бирдиктүү төлөөчү фондуна топтоо, бенефициарлардын укугун жана милдетин тең салмакташтыруу, расмий эмес төлөмдөрдү кыскартуу, алгачкы медико-санитардык көмөк көрсөтүү ролун күчтөндүрүү, саламаттык сактоодогу тейлөө сапатын камсыздоо жана көзөмөлдөөнү, башкаруу тутумун жакшыртуу, Милдеттүү медициналык камсыздандыруу фондунун түзүмүн кайрадан түзүү жана башка милдеттерди аткаруу пландаштырылууда.

Кеңешме жыйынтыгында вице-премьер-министр Саламаттыкты сактоо министрлигине саламаттыкты сактоо мекеме жетекчилери менен 2017-жылы негизсиз госпиталдаштырууну кыскартуу боюнча иш-чараларын өткөрүү, фонд менен биргеликте саламаттык сактоо уюмдарынын натыйжалуулугун талдоодон өткөрүүнү тапшырды. Ошондой эле Милдеттүү медициналык камсыздандыруу фондуна дары-дармек менен камсыздоонун жеңилдетилген программасынын ишин үзгүлтүксүз мониторингдөө, саламаттыкты сактоонун приоритеттерине жана жарандардын саламаттыкты сактоо жаатындагы укуктарын камсыздоого багытталган мамлекеттик ресурстарды пайдалануу натыйжалуулугун жогорулатуу жаатындагы келишимдердин аткарылышына монитринг жүргүзүү тапшырылды.

Автор: Айпери Ганыжан кызы
Фото: Өкмөттүн басма сөз кызматы