Сосновка көзөмөл бекетинде жүк ташуучу 60 жана күйүүчү май ташыган 12 унаа токтотулуп турат. Мурда нормадан ашык жүк жүктөгөн айдоочулар акча төлөп өтүп жүрүшкөн болсо, эми буга тыюу салынарын Жол жана транспорт министри Жамшитбек Калилов маалымат жыйында билдирди.
Анын айтымында, жүктү ашыкча салып ташыган унаалар жолдордун бат жарактан чыгышына алып келет.
"2013-жылы ашыкча жүк артып алган айдоочулардан акча алуу буйругу чыгып, ушул кезге чейин иштеп келди. Бирок биз бул абалды токтотуу үчүн токтомго өзгөртүү киргизүүнү сунуштап жатабыз. Анткени алар жолду талкалашат, бирок алардан түшкөн каражат кайра курууга жетпейт. Биздин бул аракеттерибизди калк туура түшүнөт деп ойлойм", - дейт министр.