Чыңгыз Айтматовдун 90 жылдыгын белгилөө тууралуу жарлыкка президент Алмазбек Атамбаев кол койду

Президент Алмазбек Атамбаев жазуучу Чыңгыз Айтматовдун улуттук жана дүйнөлүк маданият менен адабиятка кошкон зор салымын эске алып, анын 2018-жылы боло турган 90 жылдыгын белгилөө тууралуу жарлыкка кол койду. Бул тууралуу 21-апрелде президенттин басма сөз кызматы билдирди.

Маалым болгондой, жарлыкта Чыңгыз Айтматовдун 90 жылдыгын улуттук жана эл аралык жогорку деңгээлде белгилөө айтылган. Ошондой эле Кыргыз Өкмөтүнө сунуштар жазылган. Анда 2 айлык мөөнөттө Айтматовдун туулган күнүнүн 90 жылдыгын майрамдоого даярдык көрүү жана өткөрүү боюнча уюштуруу комитетин түзүү, ошондой эле иш-чараларды даярдоо жана өткөрүү планын иштеп чыгуу жана бекитүү жазылган.

Мындан сырткары аталган иш-чараларды даярдоо жана өткөрүү планын ишке ашыруу үчүн Кыргыз Республикасынын республикалык бюджетинен зарыл финансы каражаттарын бөлүүнү кароо айтылган. Жарлык расмий жарыяланган күндөн тартып күчүнө кирет.

Автор: Айпери Ганыжан кызы
Фото: Интернеттен алынды