Өкмөт башчы Мамлекеттик камсыздандыруу уюмунун жетекчисин сынга алды

Бүгүн, 24-апрелде премьер-министр Сооронбай Жээнбеков өзгөчө кырдаалдардын алдын алуу, аны жоюу жана өзгөчө кырдаалдарга карата мүлктүк камсыздандырууну өнүктүрүү боюнча жыйын өткөрдү. Жыйында айыл жергесиндеги элдин турак жайларын камсыздандыруу боюнча маалыматтар көпчүлүгүндө жоктугун айтып уюмдун ишмердүүлүгүн сынга алды.

“Мамлекеттик камсыздандыруу уюму” ААКсынын башкармалыгынын башчысы Бакыт Жумашевдин айтымында, бүгүнкү күндө өлкө боюнча 4638 турак жай камсыздандыруу уюму менен келишим түзгөн. 2017-жылдын 1-кварталында үч жаранга 133 006 сомдук камсыздандыруу төлөмүн берген. Төраганын берген маалыматынан улам Сооронбай Жээнбеков турак жайды камсыздандыруу боюнча жарандар арасында түшүндүрүү иштерин күчөтүүнү тапшырды.

Эскерте кетсек, Мамлекеттик камсыздандыруу уюму 2015-жылы 50 миллион сомдук уставдык капитал менен түзүлгөн. Айыл жергесиндегилер жылына 600 сом, шаардыктар 1200 сом төлөп, турак жайын камсыздандырышы керек болот.

Автор: Гүлжан Асанкожоева