КРнын Билим берүү жана илим министри Гульмира Кудайбердиева мектептеги акыркы коңгуроо майрамын 25-майда өткөрүү боюнча буйрукка кол койду. Бул туурасында министрликтин басма сөз кызматы маалымдайт. Буйрукта мектеп директорлорунун, мугалимдеринин майрамды өткөрүүгө карата акча чогултууларына жана бүтүрүүчү класстар көңүл ачуучу кафе, ресторандарга, табият коюнуна чыгып эс алууларына тыюу салынгандыгы айтылат.
Акыркы коңгуроону өткөрүүгө класс жетекчилер менен ата-энелер комитеттеринин башчылары түздөн-түз жоопкерчилик алышат. Майрамдык салтанат мамлекеттик символдор менен кооздолуп, жасалгаланышы, Кыргыз Республикасынын гимни менен коштолушу керектиги буйрукта кошумчаланат.