Мекендешибиз Мелис Толтоев Орусияда "Жылдын дарыгери" наамына көрсөтүлдү

Кыргыз жигити, медицина илимдеринин кандидаты, 32 жаштагы Мелис Толтоев Орусиянын Новосибирск шаары боюнча "Жылдын дарыгери" наамын алууга талапкер болду. Бул тууралуу ал SUPER.KG`ге бүгүн, 18-майда билдирди. Жаш экенине карабай мындай наамга көрсөтүлгөнү жөнүндө мындай дейт:

"Аракетке берекет. Ал үчүн көп изденүүгө туура келет. Илим менен практика айкалышканда гана ийгилик жаратуу оӊой болот. Кыргыз жерине барарымды убакыт көрсөтөт, бирок планда бар", - дейт Мелис Толтоев.

Мекендешибиз жогоруда аталган шаардагы Татар райондук ооруканасында 2012-жылдан тарта улуу ординатор-хирург кесибин аркалап келет. Өзүнүн көп эмес жумуштук тажрыйбасында 40 илимий эмгектин автору, 3 ойлоп табуунун авторлошу катары эмгектерин патенттештирген.

2012-жылы ал Казань шаарында өткөн VI Бүткүл орусиялык жаш окумуштуулардын илимий-практикалык конференциясында жасаган доклады үчүн I даражадагы дипломго ээ болгон.

Үй-бүлөлүү, бир кыз, бир уулдун атасы.