Өлкөдө 5 калктуу конушка "айыл" статусу берилди (тизме)

Кыргыз жериндеги 5 калктуу конуш "айыл" категориясына киргизилди. Тийиштүү мыйзамга президент Алмазбек Атамбаев кол койгонун 29-июнда президенттик аппарат маалымдады. Документти Жогорку Кеӊеш 2017-жылдын 25-майында кабыл алган эле. Мыйзам 5-июлдан тарта күчүнө кирет. Кол коюлган мыйзамга ылайык, "айыл" статусун алган конуштар булар:

Баткен облусунун Лейлек районундагы Кулунду айыл өкмөтүнүн Максат калктуу конушу;
Баткен облусунун Лейлек районундагы Ак-Суу айыл өкмөтүнүн Жезкен калктуу конушу;
Жалал-Абад облусунун Базар-Коргон районундагы Кеңеш айыл өкмөтүнүн Коткор калктуу конушу;
Ош облусунун Кара-Суу районундагы Сарай айыл өкмөтүнүн Ак-Өргөө калктуу конушу;
Ош облусунун Ноокат районундагы Найман айыл өкмөтүнүн Улуу-Тоо калктуу конушу.

Кошумчалай кетсек, 2017-жылдын 16-январында Боинг учагы кулаган Курулуш башкармалыгынын дачалары конушун да "айыл" категориясына киргизүү сунушталып жатат. Жергиликтүү жашоочулардын бул талабы орундала элек.

Автор: Автандил Добулбеков