ЕАЭБге кирбеген өлкөлөрдөн товар алып келген ишкерлер Бажыканадагы салыктын эки эсе кымбаттоосу көйгөй жаратып жаткандыгын билдиришти

ЕАЭБге кирбеген өлкөлөрдөн Кыргыз жергесине товар алып келген ишкерлерге 1-июлдан тартып Бажыканадагы салыктын эки эсе кымбаттоосу чоң көйгөй жаратып жатат. Бул тууралуу ишкер Рустам Мамбаев бүгүн, 20-июлда маалымат жыйында билдирди.

Анын айтуусунда буга Бажыкананын салык алууда жаңы ыкма менен иштеп баштаганы себеп болгон. Натыйжада салыктар эки эсе кымбаттап ишкерлер кирешесиз калууда.

"Бажыкана негизи 6 ыкма менен иштейт. Мурда биз биринчи ыкма менен салык төлөп, ага ылайык, товардын баасынын 12 пайызын салык катары төлөчүбүз. Үстүбүздөгү жылдын 1-июлунан тартып 6-ыкма менен, тагыраагы, товар жалпы жонунан таразага тартылып, ар бир килограммына 2 доллардан төлөп калдык. Товар 25 тонна болсо, 50 миң доллар төлө деген кеп. Мындай көлөмдө салык төлөсөк биз пайда таппайбыз", - дейт Рустам Мамбаев.

Андан сырткары пресс-конференцияга катышып жаткан ишкерлердин бири Евгений Завьялов аталган 6-ыкманы чийки затты ташыган ишкерлерге колдонууга болбосун айтты.

"Биз Кыргыз өлкөсүнө даяр товарды эмес чийки затты ташып келебиз да бул жактан даярдайбыз. 6-ыкма даярдалган товарлардын баасын көтөрүүгө мажбурлап, атаандаштык жаратууга бут тосот. Натыйжада Казакстан, Орусиядан товар ташыган ишкерлер менен атаандаштык жаратуу кыйынга турат", - дейт Евгений Завьялов.

Андан сырткары, салыктын жаңы ыкма менен алына баштаганынан улам, ишкерлер салыктарды төлөй албай учурда бажыканада жүздөгөн ишкерлердин жүктөрү тургандыгын айтышты.

Автор: Кенжебай Сатканалиев
Фото: Кенжебай Сатканалиев