Араванда селден жабыркаган турак жай ээлерине башка айылдан жер берилди

Ош облусунун Араван районунун Кичи-Алай айылында селден жабыркагандар башка айылга көчүрүлөт. Бул тууралуу бүгүн, 20-июлда Өкмөттүн Ош облусундагы ыйгарым укуктуу өкүлүнүн басма сөз кызматынан билдиришти.

"Селден жабыркаган 6 турак үй менен кошо сел түшүү коркунучу бар дагы 5 үй, жалпы 11 турак жай ээлери көчүрүлөт. Аларга Кең-Сай аймагынан 6 сотыхтан жер тилкелери бөлүнүп берилет. Мындан сырткары сел агымы жеп кеткен башка үй-бүлөлөргө узак мөөнөттүү насыя берүү каралууда. Бул үй-бүлөлөргө курулуш материалдарынан да жардамдар берилет. Жардамга муктаж үй-бүлөлөр шаарга жакын жайгашкан аймактан жер участок ала алышат", - деп билдирди басма сөз кызматы.

Эске салсак, буга чейин 9-июлда Араван районунда сел жүрүп, турак үйлөрдү суу каптап, авариялык абалга жеткирген.

Автор: Акназар Сулайманкулов
Фото: Жумамүдүн Сулайманкулов