Мэрия: "Бишкектеги 50 эстелик жуулду, тургундарды аларга аяр мамиле жасоого чакырабыз"

"Бишкек шаарындагы 50 чакты эстелик жуулуп, тазаланды", - деп маалымдады бүгүн, 10-августта Бишкек шаардык мэриясынын маалымат кызматы SUPER.KG порталына. Маалыматка ылайык, шаарды алдыдагы Эгемендүүлүк майрамына даярдоо иш-аракеттери жүрүп жатат.

"Аба ырайы ысыгандан тартып эле шаардагы эстеликтерди тазалоо иштери башталган. Көчөлөрдөгү, парк-скверлердеги эстеликтер жуулуп жатат, жумуш 31-августка чейин улантылат. Бул үчүн атайын суу чачуучу унаа жана "Тазалык" ишканасынын 6 жумушчусу тартылды. Тургундардын арасында эстеликтерге ар кандай боёк, кеңсе каражаттары менен жазып кеткендер бар. Жумушчулар аларды тазалоодо убара тартууда", - дейт маалымат кызматы.

Буга байланыштуу Бишкек шаардык мэриясы тургундарды эстеликтерге, маданий жайларга аяр мамиле жасоого чакырат.

Автор: Кызжибек Раимова
Фото: Бишкек шаардык мэриясынын маалымат кызматы