ЖЫЛНААМА, 29-ОКТЯБРЬ: Жогорку Кеңештин экс-депутаты Феликс Кулов 70 жашка толду

Жогорку Кеңештин экс-депутаты Феликс Кулов 1948-жылы 29-октябрда Фрунзе шаарында туулган. Ал 1971-жылы СССР ИИМнин Омск жогорку мектебинен жогорку юридикалык билимге ээ болсо, 1978-жылы Москва шаарындагы СССР ИИМнин академиясын “башкарууну уюштуруу” адистиги боюнча аяктаган.

Эмгек ишмердүүлүгүн 1966-жылы Фрунзе шаарынын ИИБисинин өзүнчө полкунун ыкчам взводунда милиционер болуп иштөөдөн баштаган.

1971-1975-жылдары Кыргыз ССР ИИМнин кылмышкерлерди издөө башкармалыгында наркоманияга каршы күрөшүү боюнча бөлүмдүн инспектору, “А” бөлүмүнүн улук инспектору;

1978-1980-жылдары Кыргыз ССР ИИМнин кылмышкерлерди издөө башкармалыгында бөлүм башчысы;

1980-1984-жылдары Талас облустук ИИБнин башчысынын орун басары;

1984-1987-жылдары Талас облустук ИИБнин башчысы;

1987-1991-жылдары Кыргыз ССР ички иштер министринин орун басары;

1991-1992-жылдары ички иштер министри;

1992-жылы вице-президент;

1993-1997-жылдары Чүй облустук мамлекеттик администрациясынын башчысы;

1997-1998-жылдары Кыргыз Республикасынын улуттук коопсуздук министри;

1998-1999-жылдары Бишкек шаарынын мэри;

2000-жылы Кылмыш-жаза кодексинин 30-беренесинин 5, 6-бөлүктөрү (кылмыш жасоого көкүтүү жана көмөктөшүү), 315-беренеси (кызматтык жасалмалоо), 304-беренесинин 3-бөлүгүнүн 3-пункту (кызмат абалынан кыянат пайдалануу) жана 177-беренесинин 2-бөлүгү боюнча кылмыш жасады деп айыпталып, камакка алынган.

2001-жылы Бишкек гарнизонунун аскердик соту аны 7 жылга күчөтүлгөн режимдеги колонияга кескен өкүм чыгарган.

2005-жылы Жогорку Соттун чечими менен толук акталган.

2005-жылы биринчи вице-премьер-министр;

2005-жылы премьер-министр;

2008-2009-жылдары Чакан жана орто энергетиканы өнүктүрүү боюнча долбоорунун дирекциясынын жетекчиси;

2010-2015-жылдары “Ар-Намыс” саясий партиясынын тизмеси боюнча Жогорку Кеңештин депутаты болгон.

29-октябрга карата жылнаама.

Автор: Жылдыз Джускембаева