Түштүк Кореядагы атактуу түгөйлөрдүн ажырашуусуна Пак Бо Гом себептүү деген кеп тарады

"Сүйлөшкөн жигитим" сериалы башталар алдындагы маалымат жыйыны учурунан.

Актёр Пак Бо Гом

Түштүк Кореядагы белгилүү жубайлар Соң Жуң Ки менен Соң Хе Кйо ажырашып жатышканы 27-июнда белгилүү болду. Эки артисттин тең агенттиктери маалыматты ырасташты. Ажырашууга атактуулардын ортосундагы айырмачылыктардын көптүгү себеп болгону айтылды.

Соң Жуң Ки менен Соң Хе Кйо.

Маалымат интернетте талкуу жаратып, атактуу түгөйлөрдүн ажырашып жатканына актёр Пак Бо Гомдун тиешеси бар деген пикирлер айтылды. Бул кептерге да негиз бар эле. Өткөн жылдын күз айында актриса Соң Хе Кйо менен актёр Пак Бо Гом чогуу сериалга тартылып, сүйүшкөндөрдүн ролун аткарышкан.

Пак Бо Гом менен Соң Жуң Ки бир агенттик менен иш алып барышат жана чыгармачылыктагы жакын достордон экени белгилүү. Түгөйлөрдүн үйлөнүү тоюна катышкан саналуу коноктордун катарында Пак Бо Гом да бар эле. Айың кептер тарагандан кийин эле Blossom Entertainment агенттиги жалган маалыматтарды жайылткандарга чара көрүлөрүн эскертти. Андан соң "27-июнда биздин артисттерди каралап, жалган маалыматтарды тараткандардын үстүнөн сотко кайрылдык" деген билдирүү таратты.

Жубайлардын таанышы басылмаларга "ушул жылдын башынан тартып экөө ажырашуу тууралуу ойлонуп башташкан. Соң Жуң Ки менен Соң Хе Кйо үчүн оор чечим болду. Бул алардын кийинки жашоосуна кандай таасирин тийгизерин да көп ойлонушту" деп маек берген.

Актёр жакынкы аралыкта коомдук иш-чараларга катышпай турганы белгилүү болду. Ал эми актриса "Анна" аттуу сериалга тартылуу сунушун карап жаткандыгы маалымдалды.

Автор: Айпери Ганыжан кызы