Ноокатта оюндан кийин чырдаша кеткен айылдаштардын иши териштирилүүдө

Ош облусунун Ноокат районунда чырдаша кеткен айыл тургундарынын окуясы териштирилүүдө. Бул тууралуу Ош ОИИБинин басма сөз кызматынан билдиришти.

Маалыматка ылайык, 11-декабрь күнү саат 17:00 чамасында Ноокат РИИБине аталган райондун Жандама айылындагы көчөлөрдүн биринде белгисиз атчан адамдар бейбаштык аракеттери менен жолдон өтүп бара жаткан унаалардын айнектерин талкалап, жарандардын денесине жаракат келтиргени боюнча маалымат түшкөн. Ыкчам-тергөө тобу окуя болгон жерге жетип барып, атчандарды таркатышып, жарандардан түшкөн арыздарды Кылмыштардын жана жоруктардын бирдиктүү реестрине каттаган.

"Тергөө иштеринде бир күн мурда Жаңы-Ноокат айылынын борборунда айыл жаштарынын ортосунда футбол мелдеши өткөрүлгөн. Футбол ойногон учурда түшүнбөстүктөр келип чыккан. Учурда чыр чыгарганга себепчи болгон жарандарды кармап келип териштирүү иштери жүрүп жатат. Бул окуя боюнча жалпысынан 5 арыз түшкөн. Арыз ээлери автоунаасына материалдык зыян келтиргендиги жана денесине жарат алгандыгы боюнча кайрылышкан. Чырдашкан тараптар баары бир улуттун өкүлдөрү. Тергөө иштери улантылууда", - деп жазылат маалыматта.

Автор: Айсалкын Качкынбекова