Кыргыз ССРинин Жогору Советинин Президиумунун төрагасынын мурдагы орун басары Канышбек Сагинбаева көз жумду

2019-жылдын 31-декабрында 83 жаш курагында Кыргыз ССРинин Жогору Советинин Президиумунун төрагасынын мурдагы орун басары, Социалисттик эмгектин Баатыры Канышбек Сагинбаева каза болду. Бул тууралуу Өкмөттүн басма сөз кызматынан билдиришти.

"Кыргыз Республикасынын коомчулугу орду толгус оор жоготууга учурады. 2019-жылдын 31-декабрында 83 жаш курагында Кыргыз ССРинин Жогору Советинин Президиумунун төрагасынын мурдагы орун басары, Социалисттик эмгектин Баатыры Канышбек Сагинбаева каза болду.

Канышбек Сагинбаева 1937-жылы 7-августта Чүй облусунун Ысык-Ата районундагы Аксай айылында туулган. Ал жеңил өнөр жай техникумун аяктап, өмүрүн өндүрүшкө, аны өркүндөтүүгө жана эмгектин өндүрүмдүүлүгүн жогорулатууга, эмгекчилердин укуктарын коргоого арнаган.

Канышбек Сагинбаева 1974-жылы Кызыл туу ордени менен сыйланган, Кыргыз ССР Коммунисттер партиясынын Борбордук комитетинин мүчөсү болуп шайланган. Бир нече жолу Кыргыз ССР Коммунисттер партиясынын Борбордук комитетинин мүчөсү, Жогорку Совет Президиумунун төрагасынын орун басары болуп иштеген. 1984-жылы ага эмгектеги жетишкен ийгилиги үчүн Социалисттик эмгектин Баатыры наамы ыйгарылган.

Маркумду акыркы сапарга узатуу зыйнаты бүгүн, 2-январда саат 10:00дө Бишкек шаары, Чүй проспектиси 127 дарегинде өтөт. Канышбек Сагинбаеванын сөөгү Ала-Арча көрүстөнүнө коюлат", - деп жазылат маалыматта.

Автор: Гүлжамал Абылкасымова