"Сыдыман" каймана аты менен белгилүү болгон блогер Элмир Сыдымановдун социалдык тармакта хейтерлер тууралуу айткан билдирүүсү коомчулуктун нааразычылыгын жараткан. 17-февраль күнү ал Октябрь РИИБинин экстремизм жана мыйзамсыз миграцияга каршы күрөшүү кызматы тарабынан 313-берененин (расалык, этникалык, улуттук, диний жана аймактар аралык кастыкты козутуу) негизинде кармалып, убактылуу кармоочу жайга киргизилген. 18-февралда блогердин баш коргоо чарасы каралып, ал эки айга камакка алынган.
Блогердин апасы Махабат Молдомусаева 21-февралда президентке кайрылуу кат жасады. Анда Махабат айым баласына эскертүү деле жетиштүү болмок экенин айтат. Катты өзгөртүүсүз беребиз:
"Урматтуу Сооронбай Шарипович, сизден башка кайрылчу арга жок калды. Биринчиден, сиздердин алдыңыздарда, жалпы кыргыз элинин алдында мен эне катары кечирим сурайм. Сизге кайрылуумдун себеби, баламдын соттук ишине адилеттүү кѳзѳмѳл жүргүзүп коюңузду ѳтүнѳм.
Мен, Элмир Сыдымановдун жалгыз бой апасы болом. Балам Инстаграмда Сыдыман деп катталып, блогерлик иш алып барчу. Анын блогерлик менен алектенүүсүн мен такыр туура кѳрбѳйм. Балам катуу жаңылып алды. Ал жаштыгы менен ѳзүнүн эмоциясына ээ боло албай, анын баракчасына катталган хейтерлердин сѳгүнгөн комментарийлерине жооп берем деп туура эмес сѳздѳрдү сүйлѳп алган. Балам ошол эле күнү сѳздѳрү хейтерлерге даректелгенин, жалпы түштүк элине эмес экенин тактап, кечирим сураган. Эми Элмир Кылмыш кодексинин 313 -беренеси менен шектелип, 7 жылга эркинен ажырашы мүмкүн деп жатышат. Видеону кѳрдүм. Сѳгүнүптүр, ѳз оюн айтыптыр, бирок эч кимди аймактык кастыкты жаратууга үгүттѳбѳптүр. Балама болгону түшүндүрүү иштери жетиштүү.
Менин акыбалымды түшүнүңүз. Эненин жүрѳгүн эске алыңыз. Элмир үйдүн улуусу жана анын кичинекей бѳбѳктѳрү бар. Сураштырсаңыз тез ынанасыз. Биздин жашоо шарт ѳтѳ оор. Элмир ѳзү жаш бала болгону менен биздин үй-бүлѳнү камсыз кылган жалгыз ушул бала. Балам кичи пейил, ѳзүнүн жардамын аябаган, саламы түз адам.
Айтмакчы, балама издѳѳ салынганын милиционерлер бизге айткан эмес. Балам Алматыда болчу. Үйгѳ укук коргоочулар келишип "балаңыз бизге жолугуп кетсин" деп эле билдирген. Балама ѳздѳрү дагы телефон чалышып, 17-февралда кел дешиптир. 17-февралда Элмир Бишкекке ѳзү келди, анан ошол күнү милиция бөлүмүнө балдар менен чогуу барып, ал жерден аны алып калышыптыр. Тергѳѳгѳ эч тоскоолдук жараткан жок. Эртеси, 18-февралда Элмирди коё бербестен эки айга камап коюшту.
Баламдан башка менин таянар кишим жок. Мен анда-санда ашпозчу болуп иштечү элем, эми жумуштан дагы айрылдым. Азыр мен сыртка чыга албай калдым. Элдин бетин карай албай калдым. Үч балам тең февралдын башынан бери кооптонуп мектепке барыша элек. Балам адам ѳлтүргѳн жок, уурулук кылган жок, эч бир адамдын ден соолугуна зыян келтирген жок, анын айткан сѳздѳрүндѳ эч кимди касташууга дагы чакыруу болгон жок. Болгону ѳз оюн сѳгүнүү сѳздѳр менен айтты. Эфирден сѳгүнгѳндүгү үчүн 7 жылга соттоо бул ѳтѳ адилетсиз.
Элмирдин эки жакты бѳлѳйүн деген такыр ою жок. Мен ѳзүм Жалал-Абад облусунун Кара-Кѳл шаарынан болом. Мен дагы түштүктүкмүн. Муну менен Элмирдин элди экиге бѳлѳйүн деген ою болгон эмес экенин баса белгилейм.
Сизден терең ѳтүнѳѳрүм, эне жүрѳгүн эске алып, биздин оор турмуш шартты эске алып, Элмирге түшүндүрүү иштерин жүргүзүү гана жетиштүү экенин эске алып, баламдын соттук ишине, катардагы жарандын үнүн уккан айкѳл эл башчы катары адилеттүү кѳзѳмѳл жүргүзүп коюңузду тереӊ ѳтүнѳм", - деп жазылат кайрылуда.
Мындан тышкары блогердин апасы акыйкатчыга, Жогорку Кеңештин депутаттарына жана укук коргоо органдарына дагы ушул эле кат менен кайрыларын кошумчалады.
