Саламаттыкты сактоо министринин орун басары маалымат жыйын берүүдө. Бир суткада 11 адамдан коронавирус аныкталды (видео, хронология)

Саламаттыкты сактоо министринин орун басары Нурболот Үсөнбаев маалымат жыйын берүүдө.

2020-05-08 10:21:00

"Коронавирус жуктуруп алган медицина кызматкерлери жумуштан кеткен учурлар болду беле?" деген суроо берилди.

"Андай учур болгон эмес. Коронавирустан айыгып, жумуштарын аткарып жатышат", - дейт министрдин орун басары.

2020-05-08 10:20:00

Бир суткада 2 миңге жакын изилдөө жүргүзүлө турганы айтылды. Кыргыз өлкөсүндө 9 лабораторияда 14 аппарат COVID-19 вирусун изилдөө жасайт.

2020-05-08 10:19:00

"Коронавирус жуктуруп алган балдардын абалы кандай?" деген суроо берилди.

Саламаттыкты сактоо министринин орун басары бардык балдар дарыгерлердин көзөмөлүндө экенин билдирди. Анын айтымында, балдардын арасында оор абалдагылар жок.

2020-05-08 10:18:00

Министрдин орун басарына "Депутат, министрлердин арасында коронавирус жуктуруп алгандар барбы?" деген суроо берилди.

Нурболот Үсөнбаев депутат, министрлердин арасында коронавирус жуктуруп алгандар жок экенин айтты.

2020-05-08 10:16:00

Үсөнбаев: "Коронавирус жуктуруп алган прокурор дарыланып жатат. Абалы канааттандырарлык", - дейт.

2020-05-08 10:15:00

"РСК банктын" эки кызматкери коронавирус жуктуруп алган. Бирөөсү Бишкек шаарында жуктуруп алган, ал учурда айыгып, ооруканадан чыгып кетти. Экинчиси Чаткал районундагы банктын кызматкери ооруп калганы аныкталган. Бүгүнкү күндө ооруканада жатат", - дейт ал.

2020-05-08 10:13:00

Нурболот Үсөнбаевдин айтымында, СИЗО-1де 1 кызматкерден коронавирус аныкталды. Азыркы учурда иликтөөлөр жүрүп жатканын билдирди.

2020-05-08 10:10:00

"Дары-дармектерди камсыздоо жана медициналык техника департаментинде коронавирус инфекциясын 5 адам жуктурган. Алардын бардыгы өз ара байланышкандар. Оору алардын арасындагы бир кызматкерден жуккан. Бардык кызматкерлер көзөмөлдө, дезинфекциялык иш-чаралар өткөрүлдү", - дейт ал.

2020-05-08 10:06:00

Бир сутка ичинде өлкө боюнча 2 медицина кызматкери коронавирус жуктуруп алды.
Бишкек шаарында – 1;
Жалал-Абад облусунда – 1.

Жалпысынан 226 медицина кызматкери коронавирус менен жабыркады. Алардын ичинен 163 медкызматкер стационарлардан айыгып чыккан.

2020-05-08 10:03:00

Өткөн суткада 11 адамдан коронавирус аныкталды. Алар:
Бишкек шаарында - 5;
Чуй облусунда - 3;
Жалал-Абад облусунда - 3.

Өлкө боюнча жалпы коронавирус жуктуруп алгандардын саны 906.

2020-05-08 10:02:00

Бир сутка ичинде 13 бейтап ооруканадан айыгып чыкты.

Бишкек шаарында - 6;
Ош шаарында - 6;
Нарын облусунда - 1.

Республика боюнча бүгүнкү күнгө чейин жалпы 650 бейтап айыгып, ооруканадан чыгарылды.

Автор: Жылдыз Джускембаева