Президенттик аппаратта 4-августта ыктыярчылар менен жолугушуу иши болуп өттү. Бул тууралуу президенттик аппараттын басма сөз кызматынан билдиришти.
Анда президент Сооронбай Жээнбековдун 21-июль күнү ыктыярчылар кыймылынын лидерлери жана активисттери менен жолугушуусунун жыйынтыгы боюнча иш-чаралар планынын ишке ашырылышы талкууланды.
Президенттик аппараттын жетекчисинин биринчи орун басары Алмаз Кененбаев планды ишке ашыруу боюнча азыркы абалды талкуулоо үчүн маалымат берди.
Ал белгилегендей, президент менен болгон жолугушууда айтылган маселелердин 70 пайызынан ашыгы аткарылды.
"Кыска убакыттын ичинде ооруканаларга орундуктарды каттоо боюнча автоматташтырылган маалымат тутуму иштелип чыкты (www.map.covid.kg). Бишкек шаары жана Чүй облусу боюнча бул тутум сыноодон өткөрүлүп жатат, аны менен бирге жалпы республика боюнча маалыматтар топтолууда.
Ошондой эле COVID.KG сайты менен Финансы министрлигинин сайтында COVID-19 менен көрүшүүнүн алкагында донордук жардамдар боюнча маалымат жана "Бирге" координациялык порталында жеке коргоочу каражаттар, дары-дармектер жана медициналык жабдуулардын керектелиши боюнча маалымат жайгаштырылган.
Мындан сырткары республика боюнча 12 саламаттыктыкты сактоо объектисинде курулуш жана оңдоп-түзөө иштери жүргүзүлүп жатат. Алардын 9 объектисинде капиталдык ремонт болуп, ошондой эле Бишкек, Ош жана Нарын шаарларында жугуштуу оорулар ооруканасынын 3 жаңы имаратынын курулушу жүрүүдө.
Ыктыярчылар менен болгон жолугушууда саламаттыкты сактоо уюмдарынын жетекчилеринин демөөрчүлөрдүн жардамы менен келген жеке коргоочу каражаттар, дары-дармектер менен камсыздоо боюнча жеке жоопкерчилигин күчөтүү, медициналык мекемелердин жетекчилеринин жоопкерчилигин комиссия менен кароо сунушталган. Аталган факты боюнча Саламаттыкты сактоо министрлиги медицина кызматкерлерин жеке коргоочу каражаттар менен камсыз кылуу боюнча саламаттык сактоо уюмдарынын жетекчилеринин жоопкерчилиги жөнүндө буйрук чыгарган.
Медицина кызматкерлерине компенсациялардын көлөмү 30 пайызга көбөйтүлгөн. Мындан сырткары Саламаттыкты сактоо министрлиги 120 медицина кызматкерин Ысык-Көл облусундагы ден соолукту чыңдоочу мекемелерге, санаторийлерге жиберишти", - деп жазылат маалыматта.
Алмаз Кененбаев ыктыярчыларга аткарып жаткан иштери үчүн ыраазычылыгын билдирип, иш-чараларды жүзөгө ашыруу ушул темпте улантыларын белгиледи. Айрым иш-чаралар азыркы учурда жыйынтыктоо процессинде болсо, туруктуу негизде дайыма ишке ашырылып туруучу иш-чаралар да бар.
Өз кезегинде ыктыярчы кыймылдардын активисттери аткарылган иштерге жана берилген маалыматтарга ыраазычылык айтышып, ошону менен бирге калк арасында дүрбөлөң азайганы менен, илдет жуктуруп алгандар боюнча статистика мурдагыдай болуп жатканына тынчсызданууларын билдиришти.
Ошондой эле ыктыярчылар коомдук фонддон Саламаттыкты сактоо министрлигине 5 "Тез жардам" унаасын өткөрүп берүү иш-чарасына катышты. Берилген унааларды Саламаттыкты сактоо министрлиги зарылдыгына жараша бөлүштүрөт. Алар чукул жардам көрсөтүү жана бейтаптарды ташуу үчүн тиешелүү медициналык жабдуулар менен жабдылган.