Нарындагы жол кырсыгынан дагы бир адам көз жумду. Ал 38 жаштагы милиция кызматкери болгон

Бүгүн, 3-февраль күнү Нарын облусунун Ат-Башы районундагы Кара-Суу айылынын Ак-Кокту тилкесинде Ауди С4 жана Тойота Ипсум унааларынын катышуусунда жол кырсыгы катталган. Кырсыктын кесепетинен 1 эркек киши каза болуп, 2 адам оор жаракат алганын ӨКМнын маалымат кызматынан билдиришкен.

Автокырсыктан дагы бир жабырлануучу каза болгонун, ал Ат-Башы РИИБинин кызматкери экенин Нарын ОИИБинин басма сөз кызматынан кабарлашты.

"Ат-Башы РИИБинин кызматкери 1982-жылы туулган М.А. Ауди-С4 үлгүсүндөгү автоунаасы менен күн чыгыштан күн батышты карай бара жаткан. Карама-каршы тилкеде жогорку ылдамдыкта келе жаткан Тойота Ипсум үлгүсүндөгү унаасы Ауди С4 унаасын келип сүзгөн.

Кырсыктын кесепетинен Тойота Ипсум унаасынын айдоочусу Т.А. окуя болгон жерден каза болгон, ал эми Ат-Башы РИИБинин кызматкери райондук оорукананын кайра жандандыруу бөлүмүнө жеткирилип, алган жаракатынан улам каза болду.

Жол кырсыгынын кесепетинен дагы үч жаран Ат-Башы райондук ооруканасына жаткырылды. Алдын ала маалыматтарга ылайык, жол кырсыгынын болушуна себепкер Тойота Ипсум үлгүсүндөгү автоунаасы болгон. Бул окуя боюнча териштирүү иштери жүргүзүлүп жатат", - дешти мекемеден.

Автор: Бактыгүл Момбекова