Ала-Бука районунда чек арада Өзбекстандын чек арачылары зым тосууга келгенде чыр чыкты

Жалал-Абад облусунун Ала-Бука районунда чек арада Өзбекстандын чек арачылары зым тосууга келгенде чыр чыкты. Бул тууралуу жергиликтүү тургун Кадыркул Курманбек уулу SUPER.KG порталына билдирди.

"Биз Ала-Бука районунун Көк-Серек айылындагы Кош-Болот участогунун тургундарыбыз. Өзбекстан тарап барган сайын биз тарапка кирип келип жатат. Чек арада 4 күндөн бери ызы-чуу болууда. Коңшу тараптын чек арачылары келип зым тартканы мамыларды орнотуу үчүн казуу иштерин жүргүзүп баштаганда жергиликтүү тургундар барып каршы чыктык. Андан соң алар кетишти. Ал жерлер негизи биздин үлүш жерлер. Эгер Өзбекстан зым тартып алса, ал жерлер өтүп кетет. Жергиликтүү жашоочулардын үнүн уккан эч ким жок. Аталган жерлер мурда талаш болуп келген, эми аларга ким кол коюп, уруксат берип койгонун билбей жатабыз", - дейт Кадыркул Курманбек уулу.

Аталган маселе боюнча мамлекеттик чек ара кызматына маалымат алуу үчүн чалып, бирок байланыша алган жокпуз.