Бишкекте Кусеин Карасаев менен Касым Тыныстановдун 120 жылдык мааракелери белгиленди

Борбор калаабыз Бишкекте Кусеин Карасаев жана Касым Тыныстановдун 120 жылдык мааракелери белгиленди. Бул тууралуу Бишкек шаардык мэриянын басма сөз кызматынан билдиришти.

Маалыматка ылайык, мамлекеттик резиденциясынын “Конгресс-Холл” үйүндө Карасаев, Тыныстановдун 120 жылдык мааракелерине жана 21-февраль – Эне тилинин эл аралык күнүнө карата иш-чара өткөрүлдү.

"Ага Бишкек шаарынын мэринин милдетин аткаруучу Бактыбек Кудайбергенов, Кусеин Карасаев атындагы Бишкек гуманитардык университетинин, Бишкек шаарынын мэриясынын түзүмдүк жана аймактык бөлүмдөрүнүн жана башка уюмдарынын өкүлдөрү катышты.

Иш-чаранын алкагында кыргыз элинин чыгаан инсандарынын мааракесине арналган видео тасмалар көрсөтүлүп, украин диаспорасынын өкүлү “Манас” эпосунан “Каныкейдин жомогунан” үзүндүнү украин тилинде айтуу менен катышуучулардын көңүлүнө толду", - деп жазылат маалыматта.

Автор: Гүлзина Каныбекова
Фото: Бишкек шаардык мэриянын басма сөз кызматы