Талас дарыясына түшүп кеткен 2 жашар бала бир аптадан бери табыла элек

Талас дарыясына чөгүп кеткен баланы издөө иштери бир аптадан бери уланууда. Буга чейинки издөө иштери натыйжа берген жок дешти ӨКМнын маалымат кызматынан.

Бүгүнкү күндө дарыяга түшүп кеткен 2 жаштагы Рамзан Айткуловду издөө иштерине куткаруучулар, милиция кызматкерлери жана жергиликтүү тургундар тартылды.

Эске салсак, 12-апрель күнү 2019-жылы туулган Рамзан Айткулов аттуу бала үйдүн короосунда ойноп жатып, белгисиз себептер менен дайынсыз болуп кеткен. Издөө иштерине 19 куткаруучу, ИИМден 80 кызматкер, жергилүктүү тургундардан 100 адам тартылганы кабарланган. Кийинчерээк ал Талас дарыясына түшүп кеткенин куткаруучулар министрлигинен маалымдашты. Издөө иштери Киров суу сактагычында да жүргүзүлгөн.

Рамзан Айткуловду издөө иштерин өкмөттүн Талас облусундагы ыйгарым укуктуу өкүлү Бакытбек Нарбеков көзөмөлгө алды.

Талас ОИИБи жогорудагы бала тууралуу кандайдыр бир маалымат билгендер болсо милицияга кабарлап коюуңуздарды суранат.

Байланыш номерлери: 03457 32314, 03422 6 0547,0701 131396, 0701 601 629, 0779 102 153.

Автор: Бактыгүл Момбекова