Көп кабаттуу үйлөрдүн короосун гүлгө толтуруп, сейил бакка айланткан Сагид Сулейманов мэрия тарабынан сыйланды

Бишкек шаарынын тургуну өзү жашаган көп кабаттуу үйлөрдүн короосуна гүлдөрдү отургузуп, жыгачтардан өз колу менен отургучтарды, чымчык, тыйын чычкандарга уя жасап берген. Дал ошол 11-кичи районго 24-апрель күнү Октябрь районунун акими Данияр Арпачиев барып, көрүп, өз баасын берип жана мунун баарын жасаган Сагид Сулеймановго мактоо сөздөрү, каалоо-тилектери жазылган грамота тапшырды.

Сагид Сулейманов 10 жыл мурун Бишкек шаарына көчүп келгенде бак-дарактардын сугарылбай, соолуп баратканын көрүп аларга арык казгандан бул иш башталган. Буга чейин таштанды жатып, каалаганы каалагандай басып өткөн жер азыркы тапта кошуналар биригип самоордон чай ичкен, шишкебек бышырып жеген, туулган күн, ооз ачуу, майрамдар өткөрүлгөн жерге айланган. SUPER.KG порталы ал жерге барып атайын репортаж даярдаган, көрүп сиз дагы суктанып алыңыз.