Бишкекте мечиттерде чогулуп жума намаз окууга убактылуу тыюу салынды

Бишкек шаарындагы мечиттерде кырдаал турукташканга чейин жума намазы убактылуу токтотулуп турат. Бул тууралуу Муфтияттын басма сөз кызматынан кабарлашты.

"Саламаттыкты сактоо жана социалдык өнүктүрүү министрлигинин, Бишкек шаардык мэриясынын жана санитардык-эпидемиологиялык көзөмөлдөө борборунун талаптарына ылайык жана калаада COVID-19 коронавирус инфекциясы көбөйүп, эпидемиологиялык кырдаал курчуп жаткандыгына байланыштуу Кыргыз өлкөсүнүн мусулмандарынын дин башкармалыгы Аалымдар кеңешинин макулдугу менен 2021-жылдын 30-апрелинен баштап абал турукташканга чейин Бишкек шаарынын аймагындагы мечиттерде жума намазын окууну убактылуу токтотуп турат", - деп жазылат билдирүүдө.

Ошондой эле 30-апрелден тарта дааватка чыгуучулардын жалпы каттоо иштерине убактылуу чектөө киргизилет. Буга чейин Бишкек шаарындагы мечиттерде ооз ачуу өткөрүүгө киргизилген чектөө күчүндө калтырылмакчы.

Автор: Азат Бейшенбеков