Баткендин мурунку башчысы: "Суроолор көп, бирок эки тараптан тең акылга сыйбаган иштер болуп жатат"

Тажик тарап биздин адамдарды коён аткандай эле атып жатат. Бул туурасында Баткендин мурунку башчысы Султанбай Айжигитов "Марал" радиосуна маек берип жаткан учурда билдирди.

Айтымында, ал Тажик тараптын мындай иш-аракеттерине таң калып жатат.

"Алар агрессор болуп, биздин территорияга кирип келип жатса, биздин үйлөрдү өрттөп жатса, биздин адамдарды өлтүрүп жатса, ал тургай өздөрүнүн чек ара бекеттеринин ичине кирип келип кол салып жатса, эмнеге унчугушпайт?

Буйрук жок деп атпай жатышат имиш. Бул деле чоң суроо. Эмне үчүн мындай болуп жатат, бул кимдин командасы?! Бул жерде суроолор аябай көп. Биз тараптан да, тажик тараптан да акылга сыйбаган иштер болуп жатат", - деди Айжигитов.

Автор: Гүлшат Ысамамат кызы