Көңүл буруңуз! Боом капчыгайында автоунаа жолу 4 күн 6 саатка жабык болот

Боом капчыгайындагы жол 3-майдан 7-майга чейин (5-майдан тышкары) жарым-жартылай жабылат. Бул тууралуу "Кыргыз темир жолу" мамлекеттик ишканасынын басма сөз кызматынан кабарлашты.

Маалыматка ылайык, бул күндөрү Бишкек-Нарын-Торугарт унаа жолунун 131-чакырымында кооптуу таштарды атайылап түшүрүү иштери жүргүзүлөт. Трассаны бойлой темир жол дагы жайгашкан.

Мындай иштер саат 09:00дөн 15:00гө чейин жүргүзүлөт. Жолду тазалоо маалында автоунаалар бир тилке менен жүрөт.

"Тазалоо иштери Ички иштер министрлигинин жол кыймылын көзөмөлдөө бөлүмүнө жүктөлгөн. Унаа ээлеринен каттамды алдын ала пландаштырып алууну суранат", - деп жазылат маалыматта.

Автор: Самира Шарипова