Ош ОИИБинин кызматкерлери Лейлекте эл көйгөйүн чечүү максатында иш алып барышууда

Ош ОИИБинин милициясынын көчмө кабылдамалары Баткен облусунун Лейлек жана Баткен райондорунда жергиликтүү тургундарды кабыл алууда. Бул тууралуу Ош облустук милициясынан билдиришти.

Маалыматка ылайык, бүгүн, 5-май күнү Ош облустук ички иштер башкармалыгынын 8 милициянын көчмө кабылдамасы Лейлек жана Баткен райондорунда жергиликтүү эл менен жолугуп, алардын көйгөйлөрүн чечүү максатында иш-чараларды алып барышты.

Жолугушуу учурунда жергиликтүү эл тарабынан айтылган көйгөйлөр:

1) Чек ара тилкесинде тез арада зымдарды тартып, кошуна мамлекет менен биротоло жерлерди чечип берүү;

2) Күйүп кеткен үйлөрдү аба ырайы өзгөргөнгө чейин тез арада оңдоп-түзөп бүтүрүп берүү;

3) Мамлекет тарабынан бөлүнүп жаткан акчаларды бир фондго түшүрүп, ошол фонддон алып, керектүү жерлерге иштетүү;

4) Электр жарыктарын жана таза суунун көйгөйлөрүн жакынкы аралыкта чечип берүү.

Милиция тургундардын жогорудагы айтылып өткөн көйгөйлөрү боюнча каттар тиешелүү органдарга жиберилгенин кошумчалады.

Автор: Гүлзина Каныбекова
Фото: Ош ОИИБинин маалымат кызматы