Бишкекте жол кире тарифин көтөрүү маселеси качан чечилери белгилүү болду

Бишкекте жол кире тарифин көтөрүү маселеси сентябрда чечилет. Бул тууралуу шаардык мэриянын маалымат кызматынан билдиришти.

Билдирүүгө ылайык, тарифтерди көтөрүү боюнча чечимди Бишкек шаардык кеңеши кабыл алат. Тийиштүү документ мыйзамга ылайык бардык этаптарды басып өтүшү керек.

"Бүгүн, 2-июнда тарифтерди көтөрүү боюнча токтом долбоору шаардык кеңеште депутаттар тарабынан каралат. Шаар мэринин милдетин аткаруучу Бактыбек Кудайбергенов аталган көйгөйдү сентябрь айында чечип берүүнү убадалады", - деп жазылат маалыматта.

Ал эми маршруттук таксилерди тейлеген компаниялар айдоочуларга түшүндүрүү иштерин жүргүзүүнү айтышты.

Маалымат үчүн:

2-июнда борбор калаада маршруттук таксилер жол акысын көтөрүү максатында каттамга чыккан эмес. Мэриядан саат 11:00дөн тарта каттамдар калыбына келтирилери айтылган болчу, бирок саат 17:50 болгонуна карабастан маршруттук таксилер каттамга чыгыша элек.