Жалал-Абад облусунда “Билим кербени” өтөт

“Роза Отунбаеванын демилгеси” эл аралык коомдук фондунун берген маалыматына ылайык, Жалал-Абад облусунда 30-октябрдан 1-ноябрга чейин “Билим кербени” өтөт. Уюштуруучулардын айтымында, аталган иш-чара Кыргыз Республикасындагы ЮНИСЕФ менен биргеликте “Мектепке чейинки 6 жаштагы балдарды милдеттүү түрдө бир жыл окутуу” долбоорунун алкагында өткөрүлөт. “Билим кербенине” райондук администрация, билим берүү бөлүмдөрү, саламаттыкты сактоо тармагынын өкүлдөрү, мектеп директорлору, башталгыч класстардын мугалимдери, китепканачылар жана ата-энелер катышат. Иш-чаранын жүрүшүндө Кара-Көл шаарындагы №3 бала бакчада “Балдарга окуп берген жылдыздар” акциясынын ачылышы болот. Мектепке чейинки билим берүү маселеси боюнча “Билим кербени” өлкөдөгү башка аймактарда да өткөрүлгөн.

Автор: Айпери Ганыжан кызы