Бишкекте сейил бактардагы жашыл өсүмдүктөргө инвентаризация жүргүзүлөт

Борбор калаанын сейил бактарындагы жашыл өсүмдүктөргө инвентаризация жүргүзүлөт. Бул тууралуу шаардык мэриядан билдиришти.

Маалыматка ылайык, Бишкек мэриясы сейил бактардагы жашыл аянттарды инвентаризациялоону баштады.

"Ар бир паркка аты жазылган бирка даярдалган. Илимдер академиясынын Токой чарбасы институту менен инвентаризация иштерин жүргүзүү боюнча келишим түзүлдү.

Инвентаризациянын жүрүшүндө алынган маалыматтар парктын айрым элементтерин капиталдык оңдоп-түзөө жана учурдагы оңдоо боюнча арыздарды түзүүдө колдонулат.

Иш-чаранын максаты - парк элементтерин жалпы пайдалануудагы жерлердин тизмесине киргизүү боюнча чечим кабыл алуу, андагы маалыматты оңдоо. Ведомостторду түзүү жана паспорттоштуруу", - деп жазылган маалыматта.

Автор: Айзада Кыдырмышева