Октябрь райондук соту Ахматбек Келдибековдун баш коргоо чарасы боюнча чечим чыгарат

Бүгүн, 22-ноябрда Октябрь райондук соту депутат Ахматбек Келдибековдун ишин карады. Журналисттер соттук процесске катышкан жок. Жогорку Кеңештин депутаты Надира Нарматованын айтымында, соттор кеңешүү бөлмөсүнө кирип кетишти. Соттун чечими угузулгандан кийин "Ата Журт" фракциясынын депутаттары соттук процесс боюнча маалымат берери айтылууда.

Бүгүн аталган райондук соттун алдына Ахматбек Келдибековдун тарапкелери митингге чыгышкан.

Эске салсак, Башкы прокуратура тарабынан Жогорку Кеңештин депутаты Ахматбек Келдибековго карата Кылмыш жана жаза кодексинин "коррупция" жана "кызмат абалынан кыянаттык менен пайдалануу" беренелери боюнча кылмыш иши козголуп, 20-ноябрда камакка алынган.

Азыркы тапта Ош шаарынын борбордук аянтында митинг өтүүдө.

Автор: Айпери Ганыжан кызы, Бекжан Рыскулов
Фото: Бекжан Рыскулов