Той-аш өткөрүүнү тартипке келтирүүгө багытталган мыйзам долбоору боюнча комиссия түзүү сунушталды

Бүгүн, 28-февралда той-аш өткөрүүнү тартипке келтирүүгө багытталган мыйзам долбоору боюнча парламенттик угуу өттү.

Мыйзам долбоорунда жазылгандай, үй-бүлөлүк салтанаттар 100дөн 200гө чейинки адамды чакыруу менен жүргүзүлөт. Ал эми үйлөнүү той салтанаттар 200дөн 300гө чейинки адамга банкет менен бир күндүн ичинде өткөрүлөт. Жарандык абалдын актыларын каттоо органдарында никелешүүнү мамлекеттик каттоо салтанаты 3төн ашык эмес жеӊил унааны колдонуу менен өткөрүлөт.

Маркумду акыркы сапарга узатуу катышуучулардын санын чектөөсүз жана ири мүйүздүү мал жана жылкы союусуз өткөрүлөт. Маркумдун элесине арналган иш-чаралар 100дөн 300гө чейин адамды чакыруу менен өткөрүлөт.

Жыйынтыгында бардык сунуш-пикирлерди эске алуу менен мыйзам долбоорунун алкагында атайын комиссия түзүү чечими кабыл алынып, ага депутаттарды, министрликтердин, жергиликтүү өз алдынча башкаруу органдарынын, жарандык коомдордун жана диний мекемелердин өкүлдөрүн киргизүү керектиги айтылды.

Автор: Жылдыз Джускембаева