"Эч качан кунун жоготпойт". Садыр Жапаров сомдун куну түшүп жатканына байланыштуу алтын сатып алууну сунуштады

Бүгүн, 28-февралда президент Садыр Жапаров кыргыз элине сомдун куну түшүп, чет элдик валюта кымбаттап жаткан шартта алтын сатып алууну сунуштады. Мындай билдирүүсүн ал өзүнүн Фейсбук баракчасына жазып чыкты.

"Каражатты алтынга салуу мүмкүнчүлүгүнө көңүл буруу абдан маанилүү. Биз алтын куймаларын каалаган санда сатып алууну өзгөчө жеңилдеттик. Ар бир валютанын куну качат. Биздин алтындын гана баасы өсөт. Ошол үчүн акчасы бар жарандарыбыз Улуттук банктан алтын сатып алыңыздар.

1 граммдан баштап, 13 килограммга чейинки алтын куймаларын каалаган көлөмдө сатып алсаңыздар болот, чек жок.

Башка өлкөлөргө алып чыгып кетүүгө да чек жок. Эч кандай төлөмдөр да жок, ушундай шарт түзүп койдук. Капиталыңарды кагаз акча менен сактагандан көрө алтын менен сактаңыздар. Ошол эле Улуттук банк сактап берет же ар ким кайда сактаса өзү билет.

Алтын эч качан кунун жоготпойт", - деп айтылат президенттин билдирүүсүндө.

Автор: Алина Айдарбекова